Molliqaj: Qeveria t’i ndryshojë masat që po e fusin vendin në krizë të thellë ekonomike

0

Kryetari i Partisë Socialdemokrate, Dardan Molliqaj, thotë se tash është koha të ndryshohen masat që ka ndërmarrë qeveria.

Molliqaj propozon që ata që mund të punojnë nga shtëpitë e tyre, të vazhdojnë të punojnë, por ata që duhet të kthehen, të kthehen në vendet e punës por duke respektuar rregullat kundër COVID.

Sipas Molliqajt, masat e Qeverisë për të parandaluar virusin COVID-19 po e fusin vendin në krizë ekonomike.

Postimi i plotë:

Koha që të ndryshohen masat që po e fusin vendin në një krizë të thellë ekonomike

Tash, kur kaluan disa javë prej vendosjes së masave të rrepta për ta parandaluar shpërndarjen e COVID-19, të dhënat nga shtete të ndryshme që zbatuan masa të ndryshme na e qartësojnë se cilat masa ishin të suksesshme e cilat jo.

Qeveria e Kosovës ndërmorri një sërë masash të përgjithshme të zbatuara në shtete të tjera, pa e marrë parasysh fare kontekstin dhe pa i përshtatur ato me nevojat e vendit tonë.

Efekti pozitiv i këtyre masave ishte ngadalësimi i shpërndarjes së virusit, mirëpo kjo nuk ndodhi në të gjitha shtetet. Ndërsa efekte negative të këtyre masave të pamenduara mirë ka shumë.

Duke qenë se këto masa ishin të përgjithshme, me ç’rast të njëjtat masa u ndërmorrën si ndaj shoqërisë në përgjithësi ashtu edhe ndaj grupeve të rrezikuara (të moshuarit dhe qytetarët me probleme të tjera shëndetësore). Kësisoj, anipse qëllimi ishte t’i ruajnë grupet e rrezikuara, këto masa veçse i rrezikuan këto grupe.

Në anën tjetër, dëmet ekonomike që tashmë kanë filluar të shihen në vendin tonë e që parashihen të jenë shumë të rënda, do të ndikojnë drejtpërdrejt në shëndetin publik të qytetarëve të vendit tonë për shkak të humbjes së vendeve të punës, rritjes së varfërisë dhe depresionit që do të shkaktohet si pasojë e këtyre efekteve.

Është koha që qysh NESËR, institucionet e vendit të reflektojnë dhe t’i rimendojnë këto masa, dhe të fokusohen tek masat mbrojtëse për grupet e rrezikuara nga COVID19, duke filluar prej atyre izoluese, financiare e deri tek kujdesi i shoqërisë ndaj tyre.

E gjithë pjesa e shoqërisë që nuk janë në marrëdhënie pune apo që mund t’i kryjnë punët nga shtëpia, duhet të vazhdojnë të qëndrojnë në shtëpi, ndërsa është e domosdoshme që të gjithë sektorët e ekonomisë, në të cilët është e mundshme të mbahet distanca në mes njerëzve dhe të ketë kushte të mira të pastërtisë, t’i kthehen punës sa më shpejt.

Orari i reduktuar i lëvizjeve tashmë po dëshmohet që ka kundërefekt, për shkak se kur koha kufizohet edhe numri i njerëzve po koncentrohet brenda një kohe të caktuar, me ç’rast qarkullimi përgjatë kësaj kohe po është më i dendur sesa në një situatë ku nuk ka orar të reduktuar të lëvizjes. Poashtu, transporti publik duhet të lëshohet në funksion menjëherë, duke e limituar numrin e njerëzve që hyjnë në të njëjtën kohë në autobusë.

Dhe e fundit, por jo nga rëndësia, pakot sociale e subvencionuese ndaj sektorit publik e privat janë masa që nuk e rigjenerojnë ekonominë, por tendencë për të blerë ”paqe sociale”. Në një krizë të tillë ekonomike, ”paqja sociale” është e kundërta e zgjidhjes së problemit, përkundrazi e mirëmban atë. Prandaj duhet urgjentisht të rritet kërkesa agregate, e kjo arrihet vetem nëse Qeveria e vendit i rritë shpenzimet publike. Në të kundërtën, nëse vazhdohet me këto masa të pamenduara, Kosova rrezikon të zhytet në një krizë të thellë ekonomike, e cila do të shkaktonte dëme të pariparueshme për një kohë të gjatë.

-Sponzor-